Maalmihii u dambeeyay, waxaa si joogto ah Garoonka Diyaaradaha ee magaalada Boosaaso u imanayay diyaarado milatari oo laga leeyahay dalka Maraykanka, kuwaas oo la xiriira fulinta qorshaha taageerada, tababarka iyo tayeynta ciidamada Puntland ee uu maalgelinayo Maraykanku.

Puntland iyo Maraykanka ayaa 2-dii Agoosto heshiis ku kala saxiixday gudaha Garoonka Diyaaradaha Boosaaso. Heshiiska ayaa la xiriira qorshaha la dagaallanka argagixisada, taageerada iyo tababarka ciidamada Puntland.

Dhanka kale, waxaa si xawli ah uga socda gudaha Puntland qorista ciidamo cusub oo qayb ka noqonaya qorshaha Maraykanku maalgelinayo, kaas oo lagu dhisayo laguna tayeynayo awoodda ciidamada Puntland.